Ögmundur Jónasson: Stendur við hvert einasta orð um Vítisengla

„Ég stend við hvert einasta orð sem ég hef sagt og er tilbúinn að svara fyrir þau, hvar sem er og hvenær sem er," segir Ögmundur Jónasson en Hells Angels hafa stefnt Ögmundi Jónassyni, innanríkisráðherra, ríkislögreglustjóra og íslenska ríkinu fyrir meiðyrði.

Á vefmiðlinum Smugunni er greint frá því í morgun að ráðherranum hafi verið afhent stefnan í gær.

Ásamt ráðherranum er Haraldi Jóhannessyni, ríkislögreglustjóra og íslenska ríkinu stefnt. Stefnan kemur Ögmundi ekki á óvart enda segir hann að hótanir hafi borist um að farið yrði í málaferli og krafist skaðabóta um ummæli sem hann hafði um samtökin og þá einstaklinga sem þeim tengjast, en hann nefndi samtökin í tengslum við skipulagða glæpastarfsemi. Ögmundur segist standa við orð sín.

Samtökin eru ósátt enda hafa Vítisenglarnir ávallt neitað því að þarna sé um glæpasamtök að ræða.