Sami Khedira: Jose Mourinho er fullkominn þjálfari

Sami Khedira, miðjuleikmaður Real Madrid og þýska landsliðsins, sparar ekki hrósið til Jose Mourinho þjálfara síns hjá spænska liðinu og segist ekki getað ímyndað sér betri þjálfara en Portúgalann.

„Mourinho er hinn fullkomni þjálfari og ekki bara fótboltalega heldur einnig sem persóna," sagði Sami Khedira í viðtali við Die Welt.

„Hann er alltaf að hjálpa þér og líka þegar þú ert ekki upp á þitt besta. Hann skilur þig aldrei eftir einan og ég get ekki ímyndað mér betri mann en hann," sagði Khedira sem hefur hlustað á þjálfara sinn þegar kemur að því að halda væntingunum niðri.

„Við erum allir sammála um það hjá Real að tala ekki um titla eins og er. Við verðum að spila vel og reyna vinna alla leiki sem við getum," sagði Khedira.

Sami Khedira er einn af fyrstu leikmönnunum sem Jose Mourinho fékk til Real Madrid eftir að hann tók við spænska liðinu sumarið 2010. Khedira kom til Real frá Stuttgart en hann er enn bara 24 ára gamall.