Rooney og Chicharito byrja - níu breytingar hjá United

Talsveðrar breytingar eru á byrjunarliði Manchester United frá leiknum gegn Liverpool um helgina en liðið mætir í kvöld rúmenska liðinu Otelul Galati á útivelli í Meistaradeild Evrópu

Þeir einu sem halda sæti sínu í liðinu eru varnarmennirnir Chris Smalling og Patrice Evra en Smalling spilar í kvöld sem miðvörður.

Nemanja Vidic og Fabio koma aftur inn í vörn United eftir langa fjarveru vegna meiðsla. Þá koma þeir Anderson, Michael Carrick, Nani og Antonio Valencia inn á miðjuna en allir voru þeir varamenn gegn Liverpool.

Í sókninni eru þeir Wayne Rooney og Javier Hernandez sem voru líka á bekknum um helgina. Þeir komu þó inn á sem varamenn í leiknum gegn Liverpool, rétt eins og Nani, og náði Hernandez að tryggja United 1-1 jafntefli.

Manchester United er enn að bíða eftir fyrsta sigrinum í riðlinum en liðið gerði jafntefli í fyrstu tveimur leikjunum sínum. Leikurinn hefst klukkan 18.45 og verður í beinni útsendingu á Stöð 2 Sport.