Ferguson: Áfrýjum ekki rauða spjaldinu

Alex Ferguson, stjóri Manchester United, var ánægður með 2-0 sigur sinna manna á Otelul Galati í Búkarest í kvöld. Wayne Rooney skoraði bæði mörk United úr vítaspyrnum.

„Í leikjum sem þessum þarf maður að hafa mikið fyrir sigrinum,“ sagði Ferguson við fjölmiðla eftir leikinn. „Þeir gerðu okkur afar erfitt fyrir. Ég er ánægður með úrslitin. Þetta var langt kvöld og við þurftum að vera þolinmóðir.“

Nemanja Vidic fékk að líta rauða spjaldið í seinni hálfleik fyrir tæklingu sem í fyrstu virtist ekki verðskulda brottvísun.

„Hann lyfti löppinni og fyrst við erum í Evrópukeppninni hef ég skilning á ákvörðun dómarans. En þetta var samt harður dómur. Ég tel þó ekki að við ættum að áfrýja.“