Wenger: Vorum þolinmóðir og agaðir

Arsene Wenger, stjóri Arsenal, var vitanlega ánægður með 1-0 sigurinn á Marseille í Frakklandi í Meistaradeild Evrópu í kvöld. Sigurmarkið skoraði varamaðurinn Aaron Ramsey í uppbótartíma.

„Þetta var afar mikilvægt mark í baráttunni um að komast í 16-liða úrslitin,“ sagði Wenger við fjölmiðla eftir leikinn í kvöld. „En ekki síður mikilvægt fyrir sjálfstraustið í liðinu.“

„Marseille spilaði mjög agaðan leik hér í kvöld en það mátti sjá á síðustu fimmtán mínútum leiksins að okkur tókst að skapa nokkur færi. Við sýndum bæði þolinmæði í kvöld og vorum agaðir í okkar leik.“

„Það voru margir að velta því fyrir sér hvernig varnarleikur liðsins yrði í kvöld og mér fannst okkur takast vel upp. Það er góður andi í liðinu og við erum að bæta okkar leik, jafnt og þétt.“