Mótmælin ekki stuðningsyfirlýsing við Sjálfstæðisflokkinn

Ég ekki viss um að fólk sé að lýsa yfir stuðningi við Sjálfstæðisflokkinn, sagði Steingrímur Sigfússon fjármálaráðherra við upphaf ræðu sinnar í umræðum um stefnuræðu forsætisráðherra. Þannig brást hann við orðum Bjarna Benediktssonar, formanns Sjálfstæðisflokksins, sem hafði bent á það í sinni ræðu að fólkið sem mótmælir fyrir utan Alþingishúsið væri ekki að lýsa yfir stuðningi við ríkisstjórnina.

„Við Íslendingar erum að sigrast á einhverjum mestu efnahagsáföllum sem nokkur vestræn þjóð hefur lent í á undanförnum árum," sagði Steingrímur. Hann viðurkenndi að margir ættu erfitt og um sárt að binda. Það yrði samt að viðurkenna þann árangur sem náðst hefði. Hagvöxtur væri genginn í garð og skerðing lífskjara stöðvuð. Atvinnuleysi væri farið að láta undan síga og hreyfing komin á húsnæðismarkaðinn. „Það eru óveðurskýin utan landssteinana sem er okkar mesta áhyggjuefni í dag," sagði Steingrímur og benti á að blikur væru á lofti í í Bandaríkjunum, en þó einkum í Evrópu.

Steingrímur viðurkenndi að það væri vissulega langt í land með að ná fullum efnahagslegum bata. Málflutningur stjórnarandstæðunnar yrði samt trúverðugri ef menn viðurkenndu þann árangur sem hefði náðst.