Ferguson óánægður með vörn og miðju United

Alex Ferguson, stjóri Manchester United, segir að sínum mönnum hafi verið refsað fyrir einbeitingarleysi í varnarleik sínum gegn svissneska liðinu Basel í Meistaradeild Evrópu í kvöld.

United mátti þakka fyrir að ná jafntefli, 3-3, í kvöld. United komst þó í 2-0 forystu en fékk þrjú mörk á sig í síðari hálfleik áður en Ashley Young jafnaði metin með skalla á 90. mínútu.

„Við vorum kærulausir. Þetta var í raun áminning til okkar því einbeitingarleysi varð okkur næstum því að falli í kvöld. En okkur tókst að bjarga þessu,“ sagði Ferguson við fjölmiðla eftir leikinn.

„Það er slæmt að fá þrjú mörk á sig á heimavelli. Vörnin og miðjan verða að standa sig betur hvað einbeitingu varðar. Ef maður gefur eitthvað eftir verður manni refsað í jafn sterkri keppni og Meistaradeild Evrópu.“

Basel komst í 3-2 forystu með marki úr vítaspyrnu sem Ferguson var ekki sáttur við. „Mér fannst þetta ekki vera víti. (Antonio) Valencia náði til boltans og vann hann. Þetta var slæm ákvörðun.“