Maradona: Agüero á skilið að spila fyrir lið eins og City

Knattspyrnugoðsögnin Diego Maradona segir að það hafi verið rétt ákvörðun hjá tengdasyni sínum, Sergio Agüero, að fara frá Atletico Madrid og ganga til liðs við Manchester City.

„Ég sagði Agüero að hann þyrfti að fara til liðs sem myndi styðja hann heilshugar,“ sagði Maradona við fjölmiðla í heimalandinu. „Hann þurfti að fara til liðs sem spilar í Meistaradeildinni og getur tekið þátt í mikilvægum keppnum.“

„Þeir voru margir hjá Atletico Madrid sem sögðu mér að ég væri flón. En ég sagði þeim að þetta flón væri ekki svo galið. Agüero er að spila hjá liði í Manchester sem mun berjast um alla titla.“

„Með fullri virðingu fyrir öðrum leikmönnum Atletico þá var það ekki sanngjarnt gagnvart Agüero að hann væri að spila í liði sem væri ekki að keppa um stóru titlana.“

„Ég hafði áhyggjur af því hversu lengi Agüero var hjá Atletico. Þar var hann eina stjarnan og náði ekki miklum árangri. En nú er Agüero hjá liði sem hann á skilið að spila fyrir.“