Sveitafélög sýna leikskólakennurum vanvirðingu

Nýútskrifaður leikskólakennari segir sveitafélögin sýna sinni stétt vanvirðingu með því að ætla að setja ófaglærða einstaklinga í störf þeirra á verkfallstímum. Eftir fimm ára háskólanám fær hún 198 þúsund krónur útborgaðar á mánuði.

Halla Hjördís Eyjólfsdóttir lauk leikskólakennaranámi frá Kennaraháskóla Íslands í fyrra og starfar nú á leikskólanum Rauðhóli í Reykjavík. Hún fór í námið meðvituð um þau laun sem voru í boði en segist ekki hafa búist við að stéttin myndi sitja eftir í launaþróun.

„Ég bjóst bara ekki við að bilið á milli okkar og til dæmis grunnskólakennara, sem við berum okkur oft við, yrði svona breitt."

Hún er ekki feimin við að sýna landsmönnum launaseðil sinn, en þess má geta að Reykjavíkurborg greiðir starfsmönnum sínum svokallað neysluhlé sem starfsmenn annarra sveitarfélaga fá ekki, sem nemur þeirri 11% hækkun sem stéttinn hefur krafist umfram aðra nýgerða kjarasamninga. Þá er yfirvinna og greiðsla vegna stuðningsbarns meðtalin.

„Síðast fékk ég útborgað 198.864. Svo er hérna deildarstjórinn minn, hún er með þrettán ára starfsreynslu og hún fær útborgaðar 226.043 krónur."

Í ljósi launanna telur hún kröfu leikskólakennara ekki ósanngjarna. Þá undrar hún sig á framkomu sambands íslenskra sveitafélaga, sem telja leikskóladeildir geta starfað áfram ef deildarstjórinn er í verkfalli.

„Ég varð bara eiginlega mjög reið. Mér finnst líka bara svekkandi og pínu vanvirðing við leikskólakennara að það sé verið að segja að hver sem er geti gengt okkar starfi og þá fer maður að hugsa, bíddu hvers vegna er ég þá að fara í háskólanám sem er nú orðið fimm ár?"