75 ný störf vegna 200 milljóna frá ríkinu

Sjötíu og fimm ný störf hafa orðið til vegna 200 milljóna króna sem ríkið veitti til að mæta samdrætti vegna kvótaniðurskurðar. Það slagar upp í helming af þeim störfum sem verða til við fyrsta áfanga Helguvíkur.

Það fór þunglega í sjávarbyggðir þegar þorskkvótinn var skertur árið 2007, útgerðirnar töluðu um milljarða tap og sveitarfélög óttuðust tekjumissi. Um haustið tilkynnti ríkisstjórnin að farið yrði í verulegar mótvægisaðgerðir upp á tíu til ellefu milljarða króna. Brot af þeirri upphæð, 200 milljónir króna fóru í að styðja nýsköpun og þróun nýrra atvinnutækifæra á landsbyggðinni.

Og nú eru niðurstöður komnar:

„Fyrstu niðurstöður sýna að þessi styrkir hafa skapað 75 ný störf og þetta voru verkefni í sjávarútvegi, iðnaði og ferðaþjónustu," segir Sigríður Elín Þórðardóttir, félagsfræðingur hjá Byggðastofnun.

Störfin eru fjölbreytt og urðu meðal annars til vegna vöruþróunar og markaðssetningar á lýsu, sæbjúgum, bláskel, kúffisk, flugveiðibúnaði, kattamat, kollageni, fiskroði og gærum.  Þá urðu til störf við hönnun og framleiðslu á flísum úr steypu og vegna markaðssetningar á smyrslum og heilsuvörum úr íslenskum jurtum. Rúmlega 250 umsóknir bárust um styrkina - en þeir voru veittir til 76 verkefna. Á móti 200 milljónum ríkisins var eigið framlag styrkþega tæpar 400 milljónir.

Flest þessara 75 starfa urðu til á Vestfjörðum - en til að setja þennan fjölda í samhengi má benda á að samkvæmt heimasíðu Norðuráls er reiknað með að ráða þurfi 200 manns fyrir fyrsta áfanga álvers í Helguvík. Almennt starfa 450-500 manns í álverunum á Íslandi - fyrir utan afleidd störf.