Leikmenn Man. Utd fóru í leikhús í gær

Sir Alex Ferguson, stjóri Man. Utd, hefur gert sitt besta í vikunni til þess að þjappa liði sínu saman fyrir úrslitaleikinn í Meistaradeildinni gegn Barcelona á morgun.

Leikmenn United fóru í leikhús í gærkvöldi. Þar sáu þeir leikritið Jersey Boys í Soho-leikhúsinu. Leikritið er byggt á ferli hljómsveitarinnar Four Seasons.

Fjölmargir ljósmyndarar fylgdu liðinu og voru þeir flestir að taka myndir af Ryan Giggs sem er mikið á milli tannanna á fólki þessa dagana.

Athygli vakti að Gary Neville fór með liðinu en hann er enn hluti af hópnum þó svo hann sé búinn að leggja skóna á hilluna.