Neuer óttast ekki Rooney

Undanúrslit Meistaradeildar Evrópu hefjast í kvöld er Schalke tekur á móti Man. Utd. Manuel Neuer, markvörður Schalke sem var lengi orðaður við Man. Utd, er fullviss um að hann nái að halda hreinu gegn Wayne Rooney rétt eins og hann gerði er hann stóð í marki Þýskalands gegn Englandi á HM.

"Síðasti leikur gegn Rooney endaði á jákvæðum nótum. Vonandi verður það sama upp á teningnum núna," sagði Neuer.

"United er með marga sterka leikmenn. Liðið er einnig með reynslumikla menn eins og Ryan Giggs og Van der Sar. Ég var mikill aðdáandi Van der Sar er ég var að alast upp.

"Annars er það liðsheildin sem er sterkust hjá United. Liðið er stjarnan. Ég er mjög hrifinn af því hvernig bolta liðið spilar," sagði Neuer.