Van der Sar vill enda ferilinn með sigri í Meistaradeildinni

Það styttist í að hinn fertugi markvörður Man. Utd, Edwin van der Sar, leggi skóna á hilluna eftir frábæran feril. Hann vill eðlilega klára ferilinn á því að vinna Meistaradeildina en United sækir Schalke heim í Meistaradeildinni í kvöld.

Þetta verður í þrettánda skiptið á ferlinum sem Van der Sar tekur þátt í undanúrslitum keppninnar sem er magnaður árangur.

"Það er alltaf gaman að spila með sigursælum liðum. Það hefur verið fínn gangur á okkur upp á síðkastið og það heldur vonandi áfram," sagði Hollendingurinn.

"Ferillinn minn hefur verið góður og vonandi endar hann á jákvæðum nótum."