Giggs: Áttum þetta skilið

Ryan Giggs, leikmaður Manchester United, átti góðan leik í kvöld en hann lagði upp bæði mörk sinna manna í 2-1 sigri á Chelsea í fjórðungsúrslitum Meistaradeildar Evrópu.

United vann samanlagðan 3-1 sigur og lagði Giggs upp öll þrjú mörk United í rimmunni.

„Við fengum frábæran leik í kvöld en maður er alltaf ánægður með að komast áfram í undanúrslitin,“ sagði Giggs við enska fjölmiðla eftir leikinn.

Chelsea sótti stíft fyrsta hálftímann en það kom Giggs ekki á óvart. „Við áttum von á því að þeir myndu sækja á okkur enda þurftu þeir að skora. Við þurftum líka að skora til að létta aðeins á pressunni á okkur.“

„Mér fannst við eiga þetta skilið. Við spiluðum vel, lögðum leikinn vel upp og héldum okkur við planið. Við uppskárum tvö góð mörk.“

„Síðara markið okkar kom á hárréttum tíma. Þeir voru nýbúnir að skora og við náðum með því að gera endanlega út um leikinn.“