Þjálfari Milan: Tottenham er ekki besta lið Evrópu

Massimilano Allegri, þjálfari AC Milan, er byrjaður að kynda bálið fyrir síðari leik AC Milan og Tottenham í Meistaradeild Evrópu. Allegri segir að Spurs sé ekki eitt af bestu liðum keppninnar í ár.

"Við áttum ekki að gera mistök gegn Tottenham á heimavelli en þeir nýttu skyndisóknirnar til þess að vinna okkur," sagði Allegri en Spurs vann leikinn á Ítalíu, 0-1.

"Þó svo liðið spili fínan fótbolta er þetta lið ekki eitt af þeim bestu í Evrópu."

Allegri er nokkuð brattur fyrir síðari leikinn þó svo hann sé í smá meiðslavandræðum.

"Andrea Pirlo og Massimo Ambrosini eru báðir meiddir og við eigum ekki mikið af miðjumönnum. Þrátt fyrir það stefnum við á sigur á White Hart Lane."