Erpur dæmir norræna rapparakeppni

„Keppnin er fyrst og fremst hugsuð fyrir ungt fólk sem er að reyna að koma sér á framfæri," segir rapparinn Erpur Eyvindarson.

Erpur situr í dómnefnd norrænu rappkeppninnar Rap It Up. Keppnin er opin öllum ungum röppurum á Norðurlöndum á aldrinum 14 til 22 ára, en eina skilyrðið er að þeir rappi á norrænni tungu. Rap It Up hófst hinn 11. maí og geta þátttakendur sent inn sitt framlag til 14. ágúst.

Keppendur hlaða upp einföldum myndböndum á vefsíðuna www.rapitup.org, og sérstakur vinnuhópur sér síðan um að velja átta bestu framlögin. Dómnefndin, með Erp innanborðs, sér svo um að skera úr um sigurvegara á úrslitakvöldi í Stokkhólmi hinn 30. september og fær sigurvegarinn 1.000 evrur að launum og tækifæri til að taka upp í fyrsta flokks hljóðveri í Stokkhólmi.

„Ég veit um fullt af liði hér á Íslandi sem ætlar að taka þátt,“ segir Erpur, sem oft er beðinn um að dæma í söng- og tónlistarkeppnum hérlendis. Hann er því fljótur að koma auga á þá sem hafa hæfileika. „Ég heyri það mjög snemma ef það er eitthvað varið í liðið. Jafnvel þó að listamaðurinn sé ekki fullmótaður, þá sér maður alveg ef það eru einhverjir hæfileikar þarna.“

Dómnefnd keppninnar er skipuð einvalaliði norrænna hipphoppara og ber Erpur þeim vel söguna. „Salazar Brothers eru goðsagnakenndasta rapphljómsveit Svía. Ég er búinn að fylgjast með þeim síðan ég var ellefu ára gamall. Joddski frá Noregi er mjög þekktur og Per Vers frá Danmörku er algjört "legend",“ segir Erpur, en fleiri norrænir rapparar sitja einnig í dómnefnd.

Áhugasamir geta kynnt sér reglur keppninnar og fengið frekari upplýsingar á vefsíðunni www.rapitup.org.

kristjana@frettabladid.is