Capello notar ekki sömu aðferðir og Eriksson

Fabio Capello, landsliðsþjálfari Englands, mun ekki fara sömu leið og Sven-Göran Eriksson er hann tilkynnir HM-hóp sinn í lok maí.

Hann mun halda liðsfund fyrir vináttuleikinn gegn Japan 30. maí þar sem hann tilkynnir hvaða 23 leikmenn fara til Suður-Afríku á heimsmeistarakeppnina.

Eftir það munu fjölmiðlar fá upplýsingar um hópinn. Eriksson fór hina leiðina og tilkynnti HM-hópa sína í sjónvarpinu þannig að leikmenn urðu að fylgjast spenntir með þar til þess að komast að því hvort þeir færu á HM eður ei.

Capello mun fara með 30 manna hóp til Austurríkis vikuna fyrir Japansleikinn og það verður síðasta tækifæri leikmanna til þess að sanna sig.

„Við verðum að ákveða hópinn fyrir Japansleikinn. Þá mun ég funda með öllum hópnum. Ég mun þakka þeim öllum fyrir sitt framlag en því miður verði ég að velja. Það verður ekki auðveld stund fyrir mig. Ég myndi vilja taka alla með mér enda allt fínir leikmenn," sagði Capello.