Segja vegið að kvikmyndagerð í landinu

25. janúar 2010 06:00

við tökur á hamrinum Hjálmtýr Heiðdal segir þátttöku RÚV forsendu fyrir fjármögnun íslenskra kvikmynda. Útvarpsstjóri segir það ekki geta verið málefni RÚV hverjir fái úthlutað styrkjum. Fréttablaðið/valli

„Það er verið að veita íslenskri kvikmyndagerð náðarhöggið,“ segir Hjálmtýr Heiðdal, formaður Félags kvikmyndagerðarmanna um niðurskurðaraðgerðir RÚV. Þær fela meðal annars í sér að dregið verður úr kaupum á innlendum kvikmyndum, sjónvarpsþáttum og heimildarmyndum.

Hjálmtýr segir að þátttaka RÚV sé forsenda fyrir fjármögnun íslenskra kvikmynda og þátta. „Fyrsta skrefið er ávallt að fá Sjónvarpið í lið með sér. Það verður að tryggja mynd sýningu til að hún fái styrk frá Kvikmyndamiðstöð. Það sama gildir um norræna og evrópska sjóði.“

Áður höfðu framlög ríkisins til Kvikmyndamiðstöðvar Íslands verið skorin niður um 35 prósent. Hjálmtýr segir niðurskurð RÚV vera olíu á þann eld og gæti riðið íslenskum kvikmyndaiðnaði að fullu. „Það tekur langan tíma að fjármagna kvikmynd. Ef Kvikmyndamiðstöð er sett á hliðina í eitt eða tvö ár er það ávísun á langt tímabil stöðnunar.“

Í þjónustusamningi RÚV og menntamálaráðuneytisins frá 2006 segir meðal annars að RÚV skuli styrkja og efla innlenda kvikmyndagerð með því að kaupa og sýna efni frá sjálfstæðum framleiðendum. Páll Magnússon útvarpsstjóri bendir á að forsenda samningsins sé sú að tekjur RÚV minnki ekki frá því sem þær voru að raungildi 2006. Sú grunnforsenda sé fallin.

„Við reynum engu að síður að uppfylla lögbundið hlutverk okkar af fremsta megni en það er ljóst að þessi niðurskurður kemur niður á öllum þáttum starfseminnar. Á liðnu ári keyptum við og sýndum á þriðja tug heimildarmynda og það verður skorið niður eins og allt annað,“ segir hann.

Páll segir kvikmyndagerðarmenn beina gagnrýni sinni í ranga átt. „Það er stjórnvalda að ákveða skilyrðin fyrir því hverjir fá úthlutun úr kvikmyndasjóði. Það verður þá bara að rjúfa þá tengingu að RÚV þurfi að skuldbinda sig til að kaupa og sýna viðkomandi mynd. Hvaða skilyrði menntamálaráðherra og Kvikmyndamiðstöð vilja hafa til að ráðstafa sínum peningum getur ekki verið málefni Ríkisútvarpsins.“

Katrín Jakobsdóttir menntamálaráðherra segir alltaf álitamál hvernig sé forgangsraðað í niðurskurði. Hún muni kanna hvernig heimtur af nefskatti hafi skilað sér til RÚV og innlendrar kvikmyndargerðar.

bergsteinn@frettabladid.is

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.