Capello ætlar að tala við Green áður en hann ákveður framhaldið

Fabio Capello, landsliðsþjálfari Englands, segist ætla að setjast niður með markverðinum Robert Green áður en hann ákveður hver muni standa í marki enska landsliðsins í næsta leik enska liðsins á HM sem er á móti Alsír á föstudaginn.

Robert Green gerði algjör byrjendamistök þegar hann missti laflaust skot Clint Dempsey í markið en það mark kostaði enska liðið á endanum sigurinn á móti Bandaríkjunum í kvöld.

„Við höfum tíma til þess að ákveða hvað við gerum. Ég mun tala við hann og eftir það mun ég ákveða um framhaldið," sagði Fabio Capello þegar hann var spurður út í það, á blaðamannafundi eftir leikinn, hvort að Green héldi sæti sínu í liðinu.

Fabio Capello sagðist ekki sjá eftir því að hafa valið Robert Green frekar en David James eða Joe Hart.