„Nú tekur þjóðin við kaleiknum“

Ólína Þorvarðardóttir, þingmaður Samfylkingar, segir að nú taki þjóðin við kaleiknum því Icesave málið sé komið úr höndum Alþingis. Hún segir brýnt að málið fái góða kynningu í aðdraganda þjóðaratkvæðagreiðslu sem fer fram fljótlega.

Alþingi samþykkti fyrr í kvöld frumvarp ríkisstjórnarinnar um þjóðaratkvæðagreiðslu vegna Icesave laganna sem Alþingi samþykkti 30. desember og Ólafur Ragnar Grímsson, forseti Íslands, neitaði að staðfesta síðastliðinn þriðjudag. Atkvæðagreiðslan fer fram í síðasta lagi 6. mars. Ólína segir í pistli á heimasíðu sinni að líklegast verði kosið laugardaginn 27. febrúar.

Þingmaðurinn segir að hlutlaus og góð kynning í aðdraganda atkvæðagreiðslunnar sé afar mikilvæg svo fólk geti áttað sig á þvi um hvað sé kosið.

„Það verður nefnilega ekki kosið um það hvort við ætlum að greiða Icesave skuldina, heldur hvernig. Málið snýst um fyrirvarana við samninginn, og því verður fólk að kynna sér þá vel með samanburði við fyrirvarana í eldra frumvarpinu sem samþykkt var 28. ágúst og mun taka gildi ef þetta frumvarp verður fellt," segir Ólína.