Ronaldo búinn að láta taka sig úr sambandi

Brasilíski knattspyrnumaðurinn Ronaldo ætlar ekki að eiga fleiri börn og hefur þess vegna ákveðið að láta taka sig úr sambandi. Hann er fjögurra barna faðir eftir að DNA-próf sannaði hinn fimm ára Alexandre væri sonur hans.

Ronaldo átti Alexandre með brasilísku gengilbeinunni Michele Umezu sem hann hitti fyrst í Tókío árið 2002. Í byrjun mánaðarins kom í ljós eftir faðernispróf að Ronaldo var pabbinn.

„Nú er ég búnn að loka verksmiðjunni," sagði Ronaldo í viðtali við brasilíska blaðið Folha de Sao Paulo. Ronaldo spilar nú með Corinthians í Brasilíu en hann eignaðist stelpuna Maria Alice í apríl.

Áður átti Ronaldo hinn 10 ára Ronald og hina tveggja ára Mariu Sophiu. Ronald er sonur Ronaldo og brailísku fótboltakonunnar Milene Domingues en tvö yngstu börnin á hann með núverandi konu sinni Mariu Beatriz Antony.

Ronaldo er 34 ára gamall og er markahæsti leikmaður HM í fótbolta frá upphafi. Hann lék á árum áðum með liðum eins og Barcelona, Inter Milan, Real Madrid og AC Milan en hefur verið Corinthians-liðinu frá 2009.