Japanir með súrefnisgrímur

Takeshi Okada, þjálfari landsliðs Japan, hefur skipað leikmönnum sínum að nota súrefnisgrímur til að undirbúa sig undir loftslagið á heimsmeistaramótinu í Suður-Afríku.

Tveir af leikjum Japan í E-riðli mótsins verða leiknir meira en 1.000 metrum yfir sjávarmáli.

„Eftir að ég hef valið hópinn mun ég láta leikmenn nota súrefnisgrímur í litlum mæli klukkustund á dag," segir Okata. „Þeir geta notað grímurnar á meðan þeir horfa á sjónvarpið."

Japan hefur aldrei unnið leik á heimsmeistaramóti utan heimalandsins. Liðið leikur með Kamerún, Hollandi og Danmörku í riðli.