Venables söng Elvis-lag á toppi O2-hallarinnar - myndband

Margar af skærustu stjörnum tónlistarheimsins hafa tekið lagið í O2-höllinni glæsilegu í London en engin þeirra hefur afrekað að syngja á toppi hallarinnar.

Það hefur Terry Venables, fyrrum landsliðsþjálfari Englands, þó gert og það með miklum stæl.

Það verður ekkert stuðningsmannalag gert um enska landsliðið í ár eins og tíðkast hefur á síðustu stórmótum. Venables hefur því tekið að sér að gefa út lag sem á að hvetja enska landsliðið til dáða.

Lagið heitir "If I can Dream" og var upprunalega flutt af sjálfum Elvis Presley.

Það var slúðurblaðið The Sun sem stóð fyrir þessum merkilega viðburði á þaki hallarinnar og má sjá mögnuð myndbönd af uppákomunni hér.