Dómsmálaráðuneytið hefur ekki svarað bréfum dómstólaráðs

Formaður dómstólaráðs hefur í fjórgang spurst fyrir um breytingar á reglum um endurrit dómsgerða hjá dómsmálaráðuneytinu, en ekki fengið svör. Hæstiréttur hefur fallist á að breyta reglunum, en fyrst þarf að tryggja ríkissaksóknara fjármagn. Hann segir málið hafa verið í sjálfheldu síðasta hálfa árið.

Við sögðum frá því í fréttum okkar fyrir helgi að Hæstiréttur hefði lýst sig sammála breytingum á lögum um endurrit dómsgerða sem fæli í sér að hún færðist frá héraðsdómstólum yfir til ríkissaksóknara. Hæstiréttur sagði hinsvegar ljóst að breytingin gæti ekki komið í framkvæmd nema ríkissaksóknari fái fjárveitingu til að standa undir kostnaði sem af því hljótist, og af þeirri ástæðu verði nýjar reglur ekki gefnar út fyrr en dómsmálaráðherra hafi hlutast til um þá fjárveitingu.

Þegar málum er áfrýjað til Hæstaréttar, þurfa dómsritarar héraðsdóma að endurrita yfirheyrslur og framburða vitna í málum. Dómstólaráð vill semsagt að sú vinna færist yfir til ríkissaksóknara, sem í raun sér um áfrýjun fyrir Hæstarétti.

Annir hjá Héraðsdómi Reykjavíkur eru til að mynda ástæða þess að mál tveggja ofbeldismanna hefur ekki verið tekið fyrir í Hæstarétti, en þeir sitja nú í gæsluvarðhaldi vegna ofbeldisbrota sem þeir frömdu á meðan beðið var eftir að málið kæmist á dagskrá.

Í bréfi sem Helgi I. Jónsson, starfandi formaður dómstólaráðs, sendir dómsmálaráðuneytinu á föstudag, og fréttastofa hefur undir höndum, segir hann að nú séu liðnir sex mánuðir frá því Hæstiréttur samþykkti að breyta umræddum reglum. Í bréfinu kemur einnig fram að Helgi hafi átt fund um þessi mál með settum ráðuneytisstjóra en bréfið er það þriðja sem hann sendir vegna málsins, en því hefur ekki verið svarað.

Dómsmálaráðherra sagði fyrir helgi að ráðuneytið væri samþykkt þessum breytingum en grunaði að héraðsdómstólar vildu færa verkefnin yfir til saksóknara, en halda eftir fjármununum. Hún sagði að málið yrði skoðað sem fyrst.

Ekki náðist í Rögnu Árnadóttur dómsmálaráðherra í morgun.

Hún hafði hinsvegar samband við fréttastofu í kjölfar þessarar fréttar í hádegisfréttum Bylgjunnar.

Ragna sagði málið standa þannig að samkomulag hefði náðst um að ráðuneytið óski eftir millifærslu á fjárheimildum í fjáraukalögum frá dómstólunum yfir til Ríkissaksóknara. Um sé að ræða 4,7 milljónir króna.