Steve Nash ætlar að fjalla um HM í Suður-Afríku á sinn einstaka hátt

Körfuboltamaðurinn Steve Nash er einn af bestu leikstjórnendum heims en hann er einnig forfallinn knattspyrnuáhugamaður og mikill húmoristi. Nash ætlar að sameina þetta tvennt næsta mánuðinn þegar hann verður meðal þúsunda fjölmiðlamanna á HM.

Steve Nash og félagar í Phoenix Suns duttu út úr úrslitum Vesturdeildarinnar á móti Los Angeles Lakers og því er Nash kominn í sumarfrí frá NBA-deildinni.

Steve Nash ætlar að nota tækifærið og skella sér á HM í fótbolta í Suður-Afríku þar sem hann mun segja frá reynslu sinni í stuttum myndskeiðum sem kom inn á CBSSports.com vefinn.

Nash er þekktur fyrir skemmtilegan húmor og aðra sýn á hluti í myndskeiðum sínum sem hafa mörg ratað inn á netið. Hann mun alls gera átta myndbönd um HM-keppnina.

Nash er fæddur í Jóhannesarborg og hann er mikill stuðningsmaður Tottenham auk þess að eiga hlut í nýju MLS-liði frá Vancouver sem er að koma inn í deildina á næsta ári.