Stefnir í nýtt met í markaleysi á HM

Það hafa aðeins verið skoruð 20 mörk í fyrstu 13 leikjunum á HM í Suður-Afríku eftir markalaust jafntefli Fílabeinsstrandarinnar og Portúgal í dag. Þetta gerir aðeins 1,54 mörk að meðaltali í leik sem er langt undir metinu í markaleysi sem er síðan á HM á Ítalíu 1990.

Það voru skoruð 115 mörk í 52 leikjum á HM á Ítalíu fyrir 20 árum eða 2,21 mark að meðaltali í leik. Í þeirri keppni voru komin 29 mörk eftir 13 leiki eða níu mörkum meira en eftir 13 leiki á HM í Suður-Afríku.

Brasilíumenn eiga næsta leik og vonast margir eftir því að þeir geta lagað eitthvað þessa "leiðinlegu" tölfræði. Leikur Brasilíu og Norður-Kóreu hefst klukkan 18.30.