Baulað á Henry á Stade de France

Stuðningsmenn Frakklands voru allt annað en sáttir við frammistöðu síns liðs í leik gegn Spánverjum í gær. Frakkar lágu 0-2 gegn Spáni á Stade de France.

Fyrirliðinn Thierry Henry fékk aðallega að heyra það en þessi 32 ára sóknarmaður segist skilja stuðningsmennina. „Þetta er ekki í fyrsta sinn sem ég upplifi svona á Stade de France. Ég skil að það sé mikilvægt fyrir fólk að við spilum vel, þegar við gerum það ekki megum við búast við að fá baul," sagði Henry.

„Ég hef bara spilað einn leik á einum og hálfum mánuði og það var mjög erfitt að hlaupa á eftir boltanum."

Raymond Domenech, þjálfari Frakka, hafði þetta að segja: „Titi hefur oft spilað betur og augljóslega er það vandamál fyrir hann að spila svona stóra leiki þegar hann hefur lítið fengið að spila með Barcelona. Staða hans hefur samt ekki náð því stigi að ég sé farinn að hafa áhyggjur," sagði Domenech.