Innlent

Hafna herferð gegn lúpínu

Skiptar skoðanir eru á því hvaða áhrif lúpína hafi á umhverfið og hvort og þá hvernig bregðast skuli við.
Skiptar skoðanir eru á því hvaða áhrif lúpína hafi á umhverfið og hvort og þá hvernig bregðast skuli við. Fréttablaðið/Valli
„Við höfnum þessu öllu saman á þeim grunni sem það er sett fram á," segir Jón Loftsson, skógræktarstjóri Skógræktar ríkisins, um fram komnar tillögur um eyðingu og heftingu á útbreiðslu lúpínu.

Forráðamenn Skógræktarinnar óskuðu eftir fundi með Svandísi Svavarsdóttur umhverfisráðherra eftir að hún hafði kynnt skýrslu með tillögum frá Landgræðslu ríkisins og Náttúrufræðistofnunar Íslands. Þær gera meðal annars ráð fyrir að gerð verði lagabreyting þannig að ræktun lúpínu verði algerlega bönnuð í yfir 400 metra hæð yfir sjó í stað 500 metra áður.

Þá er lagt til að dreifingu alaskalúpínu verði hætt nema á þeim svæðum þar sem Landgræðsla ríkisins gerir tillögur um að megi nota hana við uppgræðslu og til að undirbúa rýrt land undir ræktun. Skipa á sérstaka aðgerðastjórn vegna baráttunnar við lúpínuna. Tiltæk ráð til að uppræta hana eru helst nefnd beit, sláttur og úðun eiturefna.

Umhverfisráðherra óskaði eftir greinargerð frá Skógræktinni um skýrsluna. Þeirri greinargerð var skilað fyrr í þessum mánuði. Jón kveðst vænta þess að hún verði kynnt á sama veg og ofangreindar tillögur Landgræðslunnar og NÍ.

„Grunnurinn að þessum tillögur er sá að líffræðilegri fjölbreytni stafi hætta af lúpínunni," segir Jón. „Við teljum það alrangt. Við teljum að gera þurfi miklu ítarlegri úttekt og rannsóknir á lúpínunni, áður en menn fara af stað í einhverja herferð, ég tala nú ekki um einhvern eiturefnahernað, gegn henni. Fullyrt er að hún vaði yfir gróið land. Hvar gerir hún það? Það eru ekki til neinar rannsóknir, sem byggja má á hvort og þá hvar hún er að gera skaða."

Jón bendir á að fyrir fimmtán árum hafi verið gert kort yfir útbreiðslu lúpínu í kringum Heiðmörk. Hægast væri að gera samanburðarrannsókn á stöðunni nú. Út frá því væri sannanlega hægt að sjá hvort hún væri búin að kæfa annan gróður eða sýna aðra ógnvænlega tilburði.

„Með því að banna lúpínu á hálendinu, þar sem hún nær ekki að þroska fræ, hvað þá annað, er verið að koma í veg fyrir að eyðimerkurlandið Ísland breytist í eitthvert frjósamara land. Sagt er að hún vaði yfir lyng. Það má vera. En lyngið, sem er útbreiddasta gróðurtegund í dag, er síðasta stig hnignunar gróðurfars. Þar eru oft komin rotsvæði, sem lúpínan gerir frjósamari en þau voru áður."





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.