Mátti ekki upplýsa um dætur Gunnars

23. febrúar 2010 20:53

Ómar Stefánsson, oddviti Framsóknarflokksins í Kópavogi og formaður bæjarráðs.

Ómari Stefánssyni, oddvita framsóknarmanna í Kópavogi, var óheimilt að greina frá því að dætur Gunnars Birgissonar og tengdasynir hans hefðu gengið í Framsóknarflokkinn líkt og hann gerði á bloggsíðu sinni í dag. Uppljóstrun Ómars stangast á við reglur Framsóknarflokksins og þá er talið að hann hafi brotið lög um persónuvernd. Framkvæmdastjóri Framsóknarflokksins hafði samband við Ómar í dag vegna málsins.

„Ég þarf að skoða þetta. Þetta er ekki tekið úr flokksskránni því það er ekki eins og ég hafi verið að skoða hana og ákveðið að birta þetta." segir Ómar. Þetta hafi komið í ljós þegar hann og aðrir frambjóðendur hafi unnið að því að pakka niður bæklingum sem senda átti til flokksbundinna framsóknarmanna. Aðspurður hvort það sé ekki sami hluturinn segir Ómar svo vera.

Ómar bendir á að Gunnar hafi upplýst að frambjóðandi annars flokks hafi tekið þátt í prófkjöri Sjálfstæðisflokksins um síðustu helgi. Auk þess hafi mótframbjóðandi hans, Gísli Tryggvason, sagt í auglýsingu á Youtube að félagatal Framsóknarflokksins liggi á kosningaskrifstofu hans. Ómar undrast því þau læti sem urðu í dag vegna bloggfærslunnar.

Þá segir Ómar að framkvæmdastjóri Framsóknarflokksins hafi haft samband við sig vegna málsins og sent öðrum frambjóðendum tölvupóst.

Prófkjör Framsóknarflokksins í Kópavogi fer fram næstkomandi laugardag. Þrír sækjast eftir fyrsta sætinu.

Tengdar fréttir

Dætur Gunnars og tengdasynir gengin í Framsóknarflokkinn

„Það var greinilega mikið um nýskráningar hjá okkur. Það vakti töluverða athygli í hópnum að ein dóttir Gunnars Inga Birgissonar var gengin í Framsóknarflokkinn. Þegar betur er að gáð kemur í ljós að það er ekki bara önnur dóttirin sem er komin heldur báðar og tengdasynirnir líka,“ segir bæjarfulltrúi Framsóknarflokksins í Kópavogi, og formaður bæjarráðs, Ómar Stefánsson á bloggi sínu.

23. febrúar 2010 15:22

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.