Leikmaður Tógó: Lágum í skjóli undir sætunum í 20 mínútur

Tveir leikmenn landsliðs Tógó slösuðust í skotárásinni í dag en rúta liðsins var þá fyrir árás á leið sinni til Angóla þar sem Afríkukeppnin hefst á sunnudaginn. Þeir sem sluppu við byssukúlur urðu fyrir fyrir skelfilegri lífsreynslu.

„Það var skotið á okkur með hríðskotabyssum. Við vorum skotnir niður eins og hundar," sagði Thomas Dossevi sem spilar fyrir Nantes í Frakklandi. „Þeir voru hlaðnir skotfærum og við lágum í skjóli undir sætunum í tuttugu mínútur," sagði Dossevi.

Leikmennirnir tveir sem meiddust voru varamarkvörðurinn Obilale Kossi og miðvörðurinn Serge Akakpo. Frægasti leikmaður liðsins, Emmanuel Adebayor, slasaðist ekki samkvæmt upplýsingum frá liði hans Manchester City.