Formaður KSÍ: Erum nokkuð heppnir

Geir Þorsteinsson, formaður Knattspyrnusambands Íslands, segir að Ísland hafi verið nokkuð heppið þegar dregið var í riðla í úrslitakeppni EM U-21 landsliða í dag.

Ísland var dregið í A-riðil með gestgjöfum Danmerkur, Sviss og Hvíta-Rússlandi.

„Ég er ánægður með þessa niðurstöðu. Þó svo að við séum litla þjóðin sem allir vildu lenda á móti þá held ég að við séum nokkuð heppnir að hafa fengið þessa niðurstöðu," sagði Geir í samtali við Vísi en hann var viðstaddur dráttinn í Árósum í dag.

„Það er fínt fyrir okkur að fá Danina. Þeir eru á heimavelli og ætla sér stóra hluti á mótinu. Það verður skemmtilegur bónus að fá að mæta þeim á þeirra heimavelli en það eru margir Íslendingar í Danmörku og það mun gefa okkur aukakraft. Það verður sjálfsagt mikill áhugi fyrir þessum leik."

Í B-riðli leika lið Tékklands, Englands, Spánar og Úkraínu. Ísland var með Tékkum í undanriðlinum og tapaði í bæði skiptin þegar liðin mættust.

„Ég tel að Tékkar séu með á pappírnum eitt allra sterkasta liðið í keppninni. Það hlýtur líka að teljast gott að losna við Spán og England enda þjóðir með mikla hefð og reynslu af slíkum lokakeppnum."