Ísland í riðli með Danmörku, Sviss og Hvíta-Rússlandi

Ísland verður í riðli með Danmörku, Sviss og Hvíta-Rússlandi í úrslitakeppni EM U-21 landsliða í Danmörku næsta sumar.

Dregið var í riðlana í Árósum í Danmörku í dag en sjálft mótið fer fram í fjórum borgum á Jótlandi dagana 11. til 25. júní næstkomandi.

Ísland slapp við Tékkland, sem liðið tapaði tvívegis fyrir í undankeppnini, sem og við geysisterk lið Englands og Spánar.

Mótið er einnig undankeppni fyrir Ólympíuleikana í London árið 2012. Þrjár Evrópuþjóðir, auk Bretlands, fá þátttökurétt á leikunum.

Það þýðir að ef Englands kemst ekki í undanúrslit þarf að spila sérstakan aukaleik á milli liðanna sem tapa í undanúrslitum um sætið á Ólympíuleikunum. Sá leikur færi fram sama dag og sjálfur úrslitaleikur mótsins.

Ef England kemst hins vegar í undanúrslit fá hin liðin þrjú sem þangað komast einnig keppnisrétt á Ólympíuleikunum.

A-riðill:

Danmörk

Sviss

Hvíta-Rússland

Ísland

B-riðill:

Tékkland

Úkraína

Spánn

England