Neita fullyrðingum um að hjálparfé hafi verið notað í stríðsrekstur

Yfirvöld í Eþíópíu og alþjóðleg hjálparsamtök neita fullyrðingum breska ríkisútvarpsins, BBC, um að milljónir bandaríkjadala sem átti að nota í aðstoð fyrir hungraða á níunda áratug síðustu aldar hafi farið í stríðsrekstur.

Í skýrslu sem BBC birti var fullyrt að uppreisnarmenn í Eþíópíu hafi notað peningana í að kaupa vopn. Með þessu hafi uppreisnarmennirnir ætlað að steypa af stóli þeirri ríkisstjórn sem sat í Eþíópíu á þessum tíma. Í skýrslunni er haft eftir einum leiðtoga uppreisnarmanna að allt að 95 milljónir dala, eða 12 milljarðar íslenskra króna, af hjálparfénu hafi farið í stríðsrekstur.

BBC segir að peningarnir sem voru misnotaðir hafi meðal annars komið frá svokölluðum Band Aid hóp sem var þekktur fyrir að flytja vinsælt jólalag sem enn ómar um hver jól.