Jafntefli í fyrsta leik HM

Heimamenn í Suður-Afríku gerðu 1-1 jafntefli við Mexíkó í opnunarleik HM en leiknum var að ljúka. Heimaþjóðir hafa því enn aldrei tapað fyrsta leik sínum á HM.

Fyrri hálfleikurinn var að mestu leiti eign Mexíkó sem hóf stórsókn strax á upphafsmínútunum. Heimamenn virtust enn vera að átta sig á því að mótið væri byrjað og tæplega 100 þúsund áhorfendur á vellinum létu vel í sér heyra.

Giovani Dos Santos var allt í öllu í leik Mexíkóa, hann skapaði mikið, meðal annars eitt besta færið þegar Guillermo Franco átti skot sem markmaður Suður-Afríku varði með fínu úthlaupi.

Dos Santos átti síðan gott skot undir lok hálfleiksins sem varnarmaður heimamanna fékk í lærið og boltinn fór rétt yfir. Þá átti Franco einnig skalla úr dauðafæri eftir horn en hann hitti ekki rammann.

Í seinni hálfleik kom fyrsta mark HM þegar Siphiwe Tshabalala skoraði frábært mark. Hann fékk sendingu eftir stungusókn og hreinlega þrumaði boltanum upp í samskeytin fjær. Frábært mark og vel viðeigandi að heimamenn skoruðu fyrsta markið á mótinu á heimavelli.

En, Rafael Marquez jafnaði metin skömmu síðar og sló þögn á áhorfendur í Jóhannesarborg í nokkrar sekúndur.

Katlega Mphela fékk tækifæri til að klára leikinn á 90. mínútu fyrir heimamenn þegar hann slapp einn í gegn en hann skaut í stöngina og niðurstaðan 1-1 jafntefli.