Meiðsli lykilmanna mikil fyrir HM

Meiðsli setja strik í reikninginn hjá mörgum liðum í heimsmeistaramótinu í knattspyrnu sem hefst á morgun. Lykilmenn margra liða þurfa að bíta í það súra epli að horfa á stærsta íþróttaviðburð ársins heima hjá sér.

Fernando Torres var stærsta áhyggjuefni Evrópumeistara Spánar en hann virðist ætla að ná sér í tæka tíð. Ásamt honum á Andrés Iniesta við meiðsli að stríða en líklega geta báðir spilað í fyrsta leik riðlakeppninnar.

Brasilíumenn eiga ekki í neinum vandræðum, þeir leika ekki fyrr en 15. júní og markmaðurinn Julio Cesar verður klár í slaginn þá. Sömu sögu er að segja af Argentínu.

Enska landsliðið varð fyrir áfalli þegar Rio Ferdinand meiddist þegar hann var kominn til Suður-Afríku. Þá má ekki gleyma því að David Beckham er meiddur og væri í hópnum ef svo væri ekki. Gareth Barry er enn spurningamerki, meiðsli hans setja stórt strik í reikninginn þar sem enginn annar virðist geta spilað með Frank Lampard á miðjunni.

Portúgal mun sakna Nani og Jose Bosingwa, Nani var arkitekt sóknarleiks þeirra ásamt Cristiano Ronaldo. Þá er það áfall fyrir Frakka að Lassana Diarra verður ekki með, hann var frábær sem varnarsinnaður miðjumaður í undankeppninni. Þá er Arjen Robben tæpur hjá Hollandi og aðal markaskorari Dana, Nicklas Bendtner er tæpur.

Andrea Pirlo er einnig lykilmaður hjá Heimsmeisturunum, Ítölum. Hann er mjög tæpur fyrir allt mótið en er samt í hópnum. Svo mikils er hann metinn. Hugsanlegt er að hann geti spilað í síðasta leik riðlakeppninnar.

Fyrirliði Þjóðverja verður ekki með, Michael Ballack. Þá vantar einnig Rene Adler sem hefði byrjað í markinu, Heiko Westermann sem hefði byrjað í vörninni og Simon Rofles sem hefði líklega byrjað á miðjunni með Ballack.

Afríkuliðin eru heldur ekki heppin, hjá Ghana vantar Michael Essien, besta mann liðsins og fyrirliða. Didier Drogba er enn meiddur og óvíst er um þátttöku hans. John Obi Mikel verður ekki með Nígeríu, enn einn leikmaður Chelsea sem forfallast. Þá eru ýmsir fleiri menn tæpir fyrir fyrstu umferðina. Opnunarleikurinn á morgun verður leikur heimamanna og Mexíkó.