Tómas Ingi: Væri skemmtilegt að mæta Dönum og Englendingum

Tómas Ingi Tómasson, aðstoðarþjálfari U-21 landsliðsins, segir að skemmtilegast væri að lenda í riðli með Danmörku og Englandi í úrslitakeppni EM í sumar.

Dregið verður í riðla í dag og verður athöfnin, sem hefst klukkan 14.00, sýnd í beinni útsendingu á Rúv og á heimasíðu UEFA.

Tómas Ingi segir erfitt að benda á óskamótherja fyrir íslenska liðið enda öll átta liðin sem taka þátt í mótinu gríðarlega sterk.

„Við vonumst til að fá Englendinga eða Dani. Það væri skemmtilegt að mæta þeim," sagði hann í viðtali í hádegisfréttum Bylgjunnar.

„En þetta eru allt góð lið sem eru eftir í mótinu. Það væri þó gaman að spila við Englendinga þar sem við þekkjum mikið af leikmönnum í því liði."

Ísland á möguleika að lenda í riðli með Tékkum en þessi lið voru saman í undankeppninni.

„Við höfum spilað tvisvar við þá og töpuðum fyrir þeim í bæði skiptin. En við getum unnið þá eins og öll önnur lið á góðum degi. Við höfum sýnt að við erum góðir í fótbolta."

Danmörk mun spila í A-riðli og Tékkland í B-riðli. Þessi lið eru í efri styrkleikaflokki ásamt Íslandi og Spáni.

Í neðri styrkleikaflokki eru England, Hvíta-Rússland, Úkraína og Sviss.