Frei ætlar að hætta að spila með landsliði Sviss

Sóknarmaðurinn Alexander Frei ætlar að hætta að gefa kost á sér í svissneska landsliðið eftir tímabilið.

Frei er leikmaður Basel í heimalandinu og hefur alls spilað 81 leik með landsliðinu og skorað í þeim 40 mörk. Síðasti landsleikur hans verður væntanlega gegn Englandi á Wembley-leikvanginum í júní næstkomandi.

„Ég tók til greina allar þær óskir, beiðnir og ráðleggingar frá öllum þeim sem hafa stutt mig síðan ég hóf landsliðsferil minn," sagði Frei við fjölmiðla í gær.

„Einnig hef ég haft í huga þá sem hafa ekki farið leynt með þá skoðun sína að tími minn sé landsliðinu sé liðinn."

Hann sagðist tilkynna ákvörðun sína nú svo að landsliðsþjálfarinn Ottmar Hitzfeld hefði nægan tíma til að bregðast við henni.

„Ég hef góðan skilning á ákvörðun hans," sagði Hitzfeld. „Þetta hefur ekki verið auðvelt fyrir hann en við erum nú að missa einn allra farsælasta sóknarmann okkar frá upphafi."

Frei er 31 árs gamall.