Rooney: Vonast eftir því öðlast sömu virðingu hjá United og Beckham

Wayne Rooney talaði um það eftir tvennu sína í 4-0 sigri á AC Milan í Meistaradeildinni í gær að hann vonaðist til þess að stuðningsmenn Manchester United mun sjá hann í sama ljósi og David Beckham sem fékk vasaklúta-móttökur á Old Trafford í gær.

„David þjónaði félaginu frábærlega og allir leikmenn United voru ánægðir með móttökurnar sem hann fékk þegar hann kom inn á völlinn," sagði Wayne Rooney.

„Ég vonast til þess að ég geti líka unnið mér inn jafn mikla virðingu meðal stuðningsmanna United og David Beckham hefur gert. Ég á fullt af árum eftir og ég yrði ánægður með að fá bara helminginn af þeim móttökum sem hann fékk," sagði Rooney.

Wayne Rooney er á sínu sjötta ári hjá Manchester United, hann hefur skorað 127 mörk í 276 leikjum með félaginu, orðið enskur meistari þrisvar sinnum auk þess að vinna Meistaradeildina, tvo deildarbikara og Heimsmeistarakeppni félagsliða.

David Beckham lék í átta ár hjá Manchester United oig skoraði 87 mörk í 399 leikjum fyrir félagið. Beckham varð sex sinnum enskur meistari, vann meistaradeildina einu sinni og enska bikarinn tvisvar sinnum. Beckham fór til Real Madrid þegar hann var 28 ára gamall.