Umfjöllun: Hjálmar hetja Framara í 2-2 jafntefli á móti Fylki

Fylkismenn fóru illa með frábæra stöðu á móti Fram á Fylkisvellinum í kvöld. Fylkir var 2-0 yfir þegar rúmar fjórar mínútur voru til leiksloka og það leit allt út fyrir að strákarnir hans Ólafs Þórðarsonar væru að fara á toppinn í Pepsi-deildinni. Hjálmar Þórarinsson sem hafði komið inn á sem varamaður, skoraði hinsvegar tvö mörk á lokamínútunum og tryggði Fram 2-2 jafntefli.

Fylkir skoraði tvö mörk í fyrri hálfleik eftir að hafa refsað mistökum Framara sem virtust ekki ætla að hafa heppnina með sér. Það breyttist hinsvegar allt á lokamínútunum.

Bæði mörk Hjálmars komu eftir horn, það fyrra skoraði hann beint úr hornspyrnu á 86. mínútu og það síðara með skalla af marklínu eftir hornspyrnu Sam Tillen á þriðju mínútu í uppbótartíma.

Albert Brynjar Ingason kom Fylki í 1-0 með marki úr víti sem Kristinn Jakobsson dæmdi eftir aðeins 70 sekúndur. Jón Guðni Fjóluson sparkaði þá niður Andrés Már Jóhannesson eftir að Fylkismenn hefði sett góða pressu á varnarmenn Framara.

Framarar urðu því fyrir áfalli strax í upphafi leiks og þegar Framliðið virtist loksins vera búið að ná sér af sjokkinu í upphafi leiks þá skoruðu Fylkismenn slysalegt mark eftir aukaspyrnu langt út á velli.

Einar Pétursson kom þá Fylki í 2-0 eftir að Hannes Þór Halldórsson, markvörður Fram, hafði misst af aukaspyrnu Andrésar Más Jóhannessonar sem skoppaði í slánna og svo fyrir Einar sem skallaði boltann í tómt markið. Hannes fékk gult spjald fyrir mótmæli en hann vildi meina að það hefði verið brotið á honum.

Framliðið var mun meira með boltann en var í vandræðum með hraða leikmenn Fylkis í skyndisóknunum. Fylkismenn voru alltaf hættulegir þegar þeir unnu boltann og varnarlína liðsins gaf líka fá færi á sér fram allan leikinn.

Framliðið opnaði lítið Fylkisvörnina framan af seinni hálfleiknum og Þorvaldur Örlygsson, þjálfari Framliðsins ákvað að hrista upp í hlutunum með því aðgera þrefalda skiptingu á 58.mínútu.

Þorvaldur skipti ekki bara út þremur leikmönnum í einu. Hann færði Jón Guðna Fjóluson inn á miðjuna og setti Hlyn Atla Magnússon í hans stað í vörnina. Einn af varamönnunum var umræddur Hjálmar Þórarinsson sem átti síðan eftir að bjarga stiginu í lokin.

Framliðið pressaði Fylki nánast allan seinni hálfleikinn en gekk illa að opna Fylkisvörnina. Það var helst að þeim tókst að ógna heimamönnum í föstum leikatriðum og það voru einmitt tvö horn sem skilaði liðinu stiginu í lokin.

Fylkisliðið fékk nokkrar ágætar skyndisóknir en tókst ekki að bæta við þriðja markinu og innsigla sigurinn. Þess í stað jókst pressan frá gestunum sem voru duglegir að vinna sér inn horn og aukaspyrnur og þar skapaði Framliðið mestu hættuna.

Framarar hafa nú tvisvar sinnum bjargað stigi á útivelli eftir að hafa lent 2-0 undir og það má greinilega aldrei afskrifa strákana hans Þorvaldar Örlygssonar. Hann var líka óhræddur við að breyta miklu í einu og það gekk greinilega upp í þetta skiptið.

Fylkismenn virtust ætla að vinna sig vel út úr fyrsta tapi sumarsins og koma sér aftur á toppinn. Fylkisvörnin var búin að vera traust með Fjalar Þorgeirsson öruggan fyrir aftan og því var það mikið út úr karakter hjá Árbæingum að sofna svona á verðinum undir lokin.



Fylkir-Fram 2-2

Fylkisvöllur

Dómari: Kristinn Jakobsson (7)

Áhorfendur: 1813

Mörkin:

1-0 Albert Brynjar Ingason, víti (2.)

2-0 Einar Pétursson (31.)

2-1 Hjálmar Þórarinsson (86.)

2-2 Hjálmar Þórarinsson (90.+3)

Tölfræðin:

Skot (á mark): 9-11 (5-6)

Varin skot:  Fjalar 4 - Hannes 2

Horn: 5-11

Aukaspyrnur fengnar: 12-25

Rangstæður: 7-4

Fylkir (4-3-3)

Fjalar Þorgeirsson 6

Andrés Már Jóhannesson  7

Kristján Valdimarsson 6

Einar Pétursson 7

Þórir Hannesson 5

Ásgeir Börkur Ásgeirsson 6

Valur Fannar Gíslason 6

Tómas Þorsteinsson 6

(69., Baldur Bett 5)

Ingimundur Níels Óskarsson 5

(70., Pape Mamadou Faye 5)

Albert Brynjar Ingason 6

Kjartan Ágúst Breiðdal 5

(83., Jóhann Þórhallsson -)

Fram: (4-3-3)

Hannes Þór Halldórsson 6

Daði Guðmundsson 5

Kristján Hauksson 6

Jón Guðni Fjóluson 5

Sam Tillen 4

Halldór Hermann Jónsson 5

Jón Gunnar Eysteinsson  4

(58., Joseph Tillen 6)

Hlynur Atli Magnússon 5

Tómas Leifsson 5

(58. Guðmundur Magnússon 6)

Almarr Ormarsson 6  

Ívar Björnsson 5

(58., Hjálmar Þórarinsson 7 Maður leiksins)