Hurst: England vinnur ekki HM í sumar

Gamla hetjan, Geoff Hurst, hefur enga trú á því að England geti orðið heimsmeistari í fyrsta skipti síðan 1966 í sumar.

Hurst er á því að England hafi nógu gott lið til þess að komast í undanúrslit en hafi ekki nægilega sterkt til þess að fara alla leið í mótinu.

„Það vantar fleiri sterka leikmenn í framlínuna. Ef við hefðum mann eins og Fernando Torres með Rooney þá værum við að horfa á allt annað landslag," sagði Hurst.

„Við erum einnig viðkvæmir fyrir ef lykilmenn meiðast. Við megum ekki við því að missa Rooney eða Gerrard í meiðsli. Ég vona samt að allir þeir menn sem eru í meiðslum komi til baka því liðið má illa við því að missa menn í meiðsli."

Hurst er þó á því að réttur maður sé að stýra enska landsliðinu og segir Capello ekki ólíkan sjálfum Sir Alf Ramsey.

„Ég hef séð Capello að störfum er ég var með landsliðinu gegn Þjóðverjum í fyrra. Ég spilaði undir stjórn Ramsey í sex ár þannig að ég veit hversu líkir þeir eru."