Allir HM-leikirnir í beinni í Sjónvarpinu eða á Stöð 2 Sport

Ríkisútvarpið og Stöð 2 Sport hafa gert með sér samstarfssamning um beinar útsendingar frá Heimsmeistarakeppni landsliða í knattspyrnu sem fer fram í Suður-Afríku í sumar. Sjónvarpið hafði tryggt sér sýningarréttinn frá keppninni en Stöð 2 Sport mun nú einnig sýna leiki í beinni.

Sjónvarpið frumsýnir 46 af 64 leikjum keppninnar sem fer fram frá 11. júní til 11. júlí en Stöð 2 Sport frumsýnir 18 leiki. Báðar stöðvarnar munu sýna alla leikina 64 á meðan keppninni stendur auk þess að leikjunum verður gerð ítarleg skil í samantektarþáttum.

Samstarfsamningur þessi þýðir að Íslendingar geta séð alla leikina HM í beinni útsendingu, Stöð 2 Sport fær með samningnum góða viðbót við dagskrá sína og þá léttir samningurinn á RÚV fjárhagslega.

Sjónvarpið sýnir opnunarleik keppninnar milli Suður-Afríku og Mexíkó en reglan er að í fyrstu tveimur umferðum riðlakeppninnar sýnir Sjónvarpið þá leiki í beinni sem hefjast klukkan 14.00 og 18.30 en Stöð 2 Sport mun sýna þá leiki sem hefjast klukkan 11.30.

Í lokaumferð riðlakeppninnar fara tveir leikir fram á sama tíma og þá eru leikir á báðum stöðvum samtímis. Eftir riðlakeppnina verða beinar útsendingar eingöngu í Sjónvarpinu.