Rio Ferdinand meiddist á hné í lok æfingar enska landsliðsins

Rio Ferdinand, fyrirliði enska landsliðsins, meiddist á vinstra hné í lok æfingu enska landsliðsins í Rustenburg í Suður-Afríku í dag og þurfti að fara í myndatöku á næsta sjúkrahúsi.

Fabio Capello, landsliðsþjálfari enska liðsins, vildi lítið tala um meiðsli fyrirliðans á blaðamannafundi eftir æfinguna og sagðist bara bíða eftir niðurstöðunum úr myndatökunni.

Capello sagði að miðvörðurinn hefði meiðst eftir að hafa lent í venjulegri tæklingu og að hann hafði ekki náð að tala við Ferdinand áður en hann fór upp á sjúkrahús.

Rio Ferdinand missti mikið úr á þessu tímabili með Manchester United vegna bakmeiðsla en Fabio Capello gerði hann að fyrirliða þegar hann þurfti að taka fyrirliðabandið af John Terry vegna vandamála hans utan vallar.