Mourinho: Vildi að ég væri að spila við Inter

Jose Mourinho hlakkar mikið til að spila á San Siro á nýjan leik en lið hans, Real Madrid, mætir þar AC Milan í Meistaradeild Evrópu annað kvöld.

Mourinho var í tvö ár hjá Inter Milan sem einnig leikur heimaleiki sína á San Siro. Í fyrra varð hann þrefaldur meistari með liðinu og því er hann vitanlega í miklum metum hjá stuningsmönnum liðsins.

En nú mætir hann erkifjendunum í AC Milan. „Að spila á San Siro er alveg eins og að koma heim," sagði Mourinho við ítalska fjölmiðla. „Það er bara synd að við skulum vera að spila við AC Milan en ekki gegn Inter."

„Ég myndi glaður vilja þakka stuðningsmönnum Inter á þessum velli fyrir allt það sem þeir gáfu mér á þessum tveimur frábæru árum."