Fletcher: Ætlum áfram í næsta leik

Darren Fletcher braut ísinn fyrir Man. Utd í Tyrklandi í kvöld er liðið lagði Bursaspor, 0-3. Fletcher skoraði með hnitmiðuðu skoti í teignum.

"Það hjálpaði mikið til að skora snemma í síðari hálfleik. Við vorum að stýra leiknum og vissum að við myndum landa þessu ef við næðum inn einu marki," sagði Fletcher eftir leikinn en hann vill tryggja sér farseðilinn í sextán liða úrslitin i næstu umferð.

"Við erum í frábærri stöðu þegar það eru aðeins tveir leikir eftir í riðlakeppninni. Því fyrr sem við komumst áfram því betra. Þess vegna ætlum við að klára málið í næsta leik," sagði Fletcher en United mætir Rangers næst.