Heimsmeistarar Ítala byrjuðu titlvörnina á jafntefli við Paragvæ

Heimsmeistarar Ítala gerðu bara 1-1 jafntefli við Paragvæ í fyrsta leik sínum á HM í Suður Afríku í kvöld. Ítalir lentu 0-1 undir í leiknum en tókst að tryggja sér eitt stig í seinni hálfleiknum. Ítalir ógnuðu ekki mikið í leiknum og skoruðu markið sitt eftir markvarðarmistök.

Antolin Alacaraz kom Paragvæ í 1-0 gegn gangi leiksins þegar hann skoraði með þrumuskalla eftir aukaspyrnu Aureliano Torres af um 40 metra færi.  Alacaraz hafði þarna betur í skallaeinvígi við Fabio Cannavaro og Daniele de Rossi.

Ítalski markvörðurinn Gianluigi Buffon fór út af í hálfleik vegna og í hans stað kom inn á Federico Marchetti markvörður Cagliari. Buffon er fyrsti ítalski markvörðurinn í sögunni sem er skipt útaf í úrslitakeppni HM.

Daniele De Rossi jafnaði leikinn á 63. mínútu þegar hann nýtti sér klúður markvarðarins Justo Villar sem ætlaði að kýla í burtu hornspyrnu Simone Pepe en hitti ekki boltann sem barst til De Rossi rétt fyrir utan markið.