Sjálfstraustið komið aftur í Torres

Fernando Torres virðist vera farinn að finna sitt gamla form. Hann skoraði tvö góð mörk fyrir Spán í 4-0 sigrinum á Liechtenstein á föstudaginn.

Hann hafði aðeins skorað eitt mark í síðustu tólf landsleikjum og ekki náð að spila mikið fyrir Liverpool eftir HM í sumar.

Hann skoraði þó glæsilegt mark fyrir Liverpool um síðustu helgi. Landsliðsþjálfari hans, Vicente del Bosque, segir að Torres sé kominn með sjálfstraustið í gott lag.

"Hann skoraði ekki á HM en þessi mörk og þetta fyrir Liverpool um daginn eru góð fyrir móralinn og sjálfstraustið. Honum líður betur. Þetta er mjög gott fyrir hann og landsliðið," sagði þjálfarinn.