Ölvað fimmtugt par ruddist inn í íbúð í Árbæ

Karl og kona á fimmtugsaldri ruddust inn í íbúð í Árbænum eftir hádegi í gær og höfðu þaðan á brott með sér ýmsa muni.

Samkvæmt upplýsingum frá lögreglunni var par, sem var ölvað, var handtekið nokkru síðar í íbúð á öðrum stað í borginni. Þar innandyra fundust fyrrnefndir munir sem lögreglan haldlagði sem og exi sem þar var einnig að finna. Húsráðandinn í Árbænum, karl á fimmtugsaldri, var bólginn eftir "heimsóknina" en til einhverra átaka mun hafa komið.

Nokkuð er um að bílum sé stolið á höfuðborgarsvæðinu og því vill lögreglan minna á að þeir séu ekki skildir eftir ólæstir og í gangi. Á þessu er misbrestur og það færa þjófar sér í nyt eins og mörg dæmi eru um.

Síðast í gærkvöld kom mál af þessu tagi á borð lögreglu en þá var bíl stolið í austurborginni. Ökumaðurinn hafði skroppið inn í hús en skilið bílinn eftir á meðan ólæstan og með lykilinn í kveikjulásnum. Þegar maðurinn kom aftur að bílnum eftir að hafa lokið erindi sínu greip hann í tómt, bíllinn var á bak og burt.

Kona um fertugt var handtekin í miðborginni í nótt en þar hafði hún reynt að brjótast inn í verslun. Konan hafði ekkert upp úr krafsinu en var þess í stað færð í fangageymslu lögreglunnar við Hverfisgötu. Karl á sextugsaldri var einnig handtekinn í tengslum við rannsókn málsins.

Piltur um tvítugt varð fyrir líkamsárás í miðborginni í nótt. Sá var sleginn í andlitið og fékk skurð á augabrún. Árásarmaðurinn var á bak og burt þegar lögreglan kom á vettvang en mennirnir höfðu báðir verið í samkvæmi í heimahúsi. Við eftirgrennslan kom í ljós að enginn í samkvæminu kannaðist við árásarmanninn og virðist því hafa verið um óboðinn gest að ræða.