Holloway segir gagnrýnendum að halda kjafti

Ian Holloway, stjóri Blackpool, er þekktur fyrir að gefa mikið af sér í viðtölum við fjölmiðla og það var engin undanteking á því í gær eftir sigur hans manna á West Brom, 2-1.

Sumir sparkspekingar spáðu því fyrir tímabilið að Blackpool yrði lélegasta liðið í sögu ensku úrvalsdeildarinnar og að það myndi bæta met Derby County sem fékk ellefu stig allt tímabilið 2007-8. Blackpool er nú með þrettán stig eftir sigurinn í gær.

„Við verðum ekki það lið sem fær fæstu stig í sögu deildarinnar. Sá sem skrifaði það getur haldið kjafti," sagði Holloway. „Svona líður mér. Þetta var ósanngjarnt og þeir dæmdu okkur of snemma."

Sigurinn í gær var fyrsti heimasigur Blackpool í efstu deild síðan 1971. Liðið er nú í níunda sæti ensku úrvalsdeildarinnar.

Holloway var í dag dæmdur í eins leiks bann og sektaður um 9500 pund fyrir ummæli sem hann hafði um dómara leiks Blackpool og Blackburn þann 25. september síðastliðinn.

Hann missir því af næsta leik Blackpool.