Nesta ætlar ekki að spila með Ítalíu á HM

Marcello Lippi, landsliðsþjálfari Ítalíu, segir engar líkur vera á því að Alessandro Nesta, varnarmaður AC Milan, spili með landsliðinu á HM.

Það hefur verið mikil pressa á Nesta að snúa aftur í landsliðið þar sem hann hefur verið að spila frábærlega með Milan í vetur.

Lippi fór og hitti Nesta í þeirri von að snúa honum. Það gekk ekki.

„Hann sagði mér í fullri einlægni að hann hefði ekki lengur áhuga á að spila fyrir landsliðið. Mér þykir þetta leiðinlegt því mig langaði að koma öllum á óvart með því að tilkynna um endurkomu hans í landsliðið. Ég virði samt ákvörðun hans," sagði Lippi.