Galaxy komið í úrslit Vesturstrandarinnar

David Beckham lagði upp bæði mörk LA Galaxy er liðið vann 2-1 sigur á Seattle Sounders í síðari viðureign liðanna í úrslitakeppni MLS-deildarinnar í nótt.

Galaxy vann þar með rimmuna samanlagt 3-1 og er komið í úrslit Vesturdeildarinnar þar sem liðið mætir FC Dallas.

Edson Buddle og Omar Gonzalez skoruðu mörk Galaxy með skalla eftir sendingu frá Beckham.

Beckham var frá í hálft ár vegna meiðsla fyrr á þessu ári og missti af HM í Suður-Afríku vegna þessa.

„Bati hans hefur verið ótrúlegur en hann hefur verið að spila stórkostlega síðan hann byrjaði aftur eftir meiðslin," sagði Bruce Arena, þjálfari Galaxy, eftir leikinn í gær.